आरएन पटेल
रौतहट, साउन ३१गते
भारतीय क्रिकेट टोलीका पूर्वकप्तान एवम् विकेटकिपर ब्याट्सम्यान महेन्द्रसिंह धोनीले अन्तर्राष्ट्रिय क्रिकेटबाट सन्यासको घोषणा गरेका छन् ।
शनिबार साँझ सामाजिक सञ्जाल इन्स्टाग्राममा एक भिडियोसहितको पोस्ट जारी गर्दै धोनीले उक्त घोषणा गरेका हुन् । उनले सदैव साथ दिने र समर्थन गर्नेहरुलाई धन्यवाद समेत दिएका छन् ।
३८ वर्षीय धोनीले भारतका लागि ३५० एकदिवसीय खेल्दै १० हजारभन्दा बढी रन बनाएका छन् भने ९० वटा टेस्ट खेल्ने क्रममा ४ हजार ८७६ रन बनाएका छन् ।
धोनीको कप्तानीमा भारतले सन् २००७ को टी ट्वान्टी विश्वकप, सन् २०११ को एकदिवसीय विश्वकप र सन् २०१३ को आइिससी च्याम्पियन्स ट्रफी जितेको थियो । उनी भारतका सबैभन्दा सफल कप्तानका रुपमा चिनिन्छन् ।
विकेटकिपिङ तथा फिनिसिङमा अब्बल मानिने धोनीले यस संस्करणको इन्डियन प्रिमियर लिग आइपिएल क्रिकेट भने खेल्ने अपेक्षा गरिएको छ । त्यसका लागि उनी अभ्यास सत्रमा पनि सहभागी भइरहेको भारतीय सञ्चारमाध्यमहरुले जनाएका छन् । धोनी चेन्नई सुपर किंग्सका पनि कप्तान हुन् ।
यसैबीच अर्का भारतीय खेलाडी सुरेश रैनाले पनि अन्तर्राष्ट्रिय क्रिकेटबाट सन्यासको घोषणा गरेका छन् । बाँयाहाते ब्याट्सम्यान रैना पनि भारतीय मध्यक्रमका उत्कृष्टमध्येका एक ब्याट्सम्यानका रुपमा चिनिन्छन् । रैना पनि आइपिएल टिम चेन्नईबाट धोनीसँगै खेल्ने गर्दछन् । साभार साझा पोष्ट
