रौतहटको अनिश्चितकालिन कर्फ्यु हट्यो
रौतहट, ९ फागुन । ईशनाथ नगरपालिकामा दुई समुदाय बिच विवाद र तनाव हुँदा प्रशासनले लगाएको अनिश्चितकाल कर्फ्य पूर्ण रुपमा हटेको छ । ईशनाथ नगरपालिका–७ घिउरा गाँउमा सरस्वती पूजाको मुर्ति विर्सजनगर्ने क्रममा फागुन ५ गते दुई समुदाय बिच विवाद भएको थियो । सो विवाद उग्ररुप लिए पछि जिल्ला प्रशासन कार्यालय रौतहटले कर्फयु आदेश जारी गरेको थियो । जिल्ला प्रशासन कार्यालयमा बुधबार बसेको सर्वदलिय बैठकको निर्णय अनुसार प्रशासन कार्यालयले सूचना जारीगरी ईशनाथ नगरपालिका क्षेत्रमा लगाएको कर्फ्यु बुधवार बेलुका ५ बजेबाट पूर्ण रुपमा हटाएको जनाएको छ । रौतहटका प्रमुख जिल्ला अधिकारी हिरालाल रेग्मीका अनुसार हिन्दु र मुस्लिम दुवै समुह बिच उत्पन्न भएको विवादलाई नियन्त्रणमा लिई शान्ति सुरक्षा कायम गर्न कर्फ्य आदेश जारी गरिएको थियो । स्थानीय प्रशासन ऐन, २०२८ को दफा ६ को (क) को ५ बमोजिम कर्फ्य पूर्ण रुपमा हटाईएको उहाँले भन्नुभयो । यसअघि जिल्ला प्रशासन कार्यालय तथा सो क्षेत्रका निर्वाचित पदाधिकारीहरु, मधेश प्रदेशका प्रहरी नायव महानिरीक्षक, सशस्त्र प्रहरी बल नं. २ मधेश प्रदेशका सशस्त्र प्रहरी नायव महानिरीक्षक, राष्ट्रिय अनुसन्धान मधेश प्रदेशका निर्देशक लगायतको सकृयतामा मंगलबार सरस्वती माताको मुर्ति स्थानीय पोखरीमा विर्सजन गराएको थियो । समाजिक सद्भाव कायम राख्न सहयोग गरेको तथा मुर्ति बिर्सजनमा सराहनिय भूमिका गरेकाहरु प्रति रौतहट प्रशासनले धन्यवाद व्यतm गरेका छन् । मुर्ति विर्सजन भएपछि सो ठाउँको जनजिवन समान्य भएकोमा लगाइएको अनिश्चितकालिन कर्फ्य पूर्ण रुपमा हटेको जिल्ला प्रहरी कार्यालय रौतहटका प्रहरी उपरीक्षक महेन्द्र कुमार श्रेष्ठले जानकारी दिनुभयो ।
