उत्तम कुमार उपाध्याय ।
रौतहट, १८ जेठ । सशस्त्र प्रहरी बल नेपाल ११ नम्बर गण हेडक्वाटर हजमिनिया रौतहटले आर्थिक वर्ष २०७७÷०७८ मा भन्सार छली नेपाल भित्रियाईएको पौने ६ करोड रुपैयाँ भन्दा बढीको माल सामान नियन्त्रणमा लिएर कारवाही गरेको छ ।
भारतबाट अवैध रुपले नेपाल भित्रिएको मोरसाईकल र चारपांगे्र गरी एक सय ४ वटा सवारी साधनलाई कारवाही गर्दा एक करोड ६३ लाख ३० हजार ३३ रुपैयाँ राजस्व संकलन भएको सशस्त्र प्रहरी बल नेपाल ११ नम्बर गण हेड क्वाटर हजमिनिया रौतहटका प्रमुख सशस्त्र प्रहरी उपरिक्षक सुरेश सेन ओलीले जानकारी दिनु भयो ।
उहाका अनुसार, चौपाया, अण्डा, माछा तथा पशुपंक्षीलाई नियन्त्रणमा लिएर कारवाही गर्दा ३६ लाख ६२ हजार ६ सय ३० रुपैयाँ, तस्करीको लताकपडा नियन्त्रणमा लिएर कारवाही गर्दा ३ करोड ९ लाख २० हजार ३ सय २५ रुपैयाँ, अवैध रुपले वन क्षेत्रबाट ल्याईएको सालका काठ नियन्त्रणमा लिएर कारवाही गर्दा ८ लाख ६४ हजार ४ सयोवारमा ५० रुपैयाँ, हुण्डी कारोवारबाट बरामद नगद ५१ लाख १७ हजार ६ सय ९० रुपैयाँ, अवैध औषधी नियन्त्रणमा लिएर कारवाही गर्दा २ लाख ९ हजार ८ सय ४७ रुपैयाँ, तस्करीको मल नियन्त्रणमा लिएर कारवाही गर्दा ८५ हजार ८ सय रुपैयाँ, नेपालबाट भारत तर्फ तस्करी हुन लागेको विभिन्न किसिमका मदिराबाट ५ लाख ८६ हजार ४ सय ९४ रुपैयाँ राजस्व संकलन गरिएको हो ।
बरामद भएको मालवस्तु गौर भन्सार कार्यालयमा बुझाउदा अहिले सम्म ५ करोड ७७ लाख ७७ हजार २ सय ६९ रुपैयाँ राजस्व संकलन भएको सशस्त्र प्रहरी उपरिक्षक ओलीले जानकारी दिनु भयो ।
सो अवधी तस्करीमा संलग्न ४६ जना व्यक्तीलाई नियन्त्रणमा लिएर थप कारवाहीको लागी गौर भन्सार र जिल्ला प्रहरी कार्यालय रौतहटमा बुझाईएको उहाले बताउनु भयो ।
