हेटौंडा–मकवानपुर गढी गाउँपालिका–२ मा रहेको टासी देक्षेन छ्योइलिङ गुम्बामा त्रिमुर्तिको प्राण प्रतिष्ठा गरिएको छ ।
नेपाली कांग्रेस मकवानपुरका सभापति एवं प्रदेश ३ कांग्रेस संसदीय दलका नेता ईन्द्रबहादुर बानियाँले टासी देक्षेन छ्योइलिङ गुम्बामा त्रिमुर्तिको प्राण प्रतिष्ठा गरेका हुन् । कार्यक्रममा बोल्दै नेता बानियाँले सरकारले ल्याउन लागेको गुठी सम्बन्धी विधेयकले नेपालको धर्म संस्कृतिको अमपान गरेको भन्दै त्यसलाई खारेज गर्नुपर्ने बताए ।
उनले गुम्बामा मात्र नभई गाउँपालिकाकै समग्र विकास निर्माण र आधारभूत आवश्यकताको आधारमा सहयोग गर्ने प्रतिवद्धता जनाए । गुम्बा संरक्षण समितिका अध्यक्ष प्रेम बहादुर भोम्जनको अध्यक्षतामा भएको कार्यक्रममा नेपाली कांग्रेस जिल्ला कार्यसमितिका सहसचिव रामबाबु बानियाँ, नेपाली कांग्रेस २ नम्बर क्षेत्रीय सभापति यतिराज सापकोटालगायतको उपस्थिति रहेको थियो ।