रौतहट ।असोज २६ गते
रौतहट जिल्लाको विभिन्न सिमा नाकाहरुबाट भन्सार छलि गरि अबैध रुपमा चोरी निकासीका विभिन्न सामानहरु प्रहरीले बेवारीसे अवस्थामा बरामद गरेको छ । जिल्ला प्रहरी कार्यालय रौतहट मातहतबाट खटिएको प्रहरी गस्ती टोलीले गौर नगरपालिका वडा नं. १ स्थितमा भारतबाट भन्सार छली चोरी पैठारी गरी नेपाल तर्फ भित्र्याईरहेको अवस्थामा कष्टमेटिकका सामानहरु बरामद गरेको छ । सो सामानको मूल्य आठ हजार चार सय चौध बराबरको रहेको प्रहरीको अनुमान छ । त्यसैगरि अस्थायी प्रहरी पोष्ट बसपार्क र महादेवपट्टीबाट खटिएको प्रहरी टोलीले रौतहटको गौर नगरपालिका वडा नं.२ महादेवपट्टी र वडा नं. ४ बसपार्क स्थितबाट अबैध रुपमा भारतबाट भन्सार छली चोरी पैठारी गरी ल्याएको रेडिमेड कपडाहरु, थान कपडा, जिन्स पाईन्ट, लंहगाहरु बरामद गरेको छ। सो सामानको मूल्य १ लाख १३ हजार ३ सय २५ बराबरको रहेको प्रहरीले बताएको छ। यस्तै जिल्ला प्रहरी कार्यालय रौतहटबाट खटिएको प्रहरी गस्ती टोलीले जिल्लाको गौर नगरपालिका वडा नं. १ कानुटोल स्थितबाट लेडिज सेन्डल, लेडिज लखानी चप्पल, जेन्स चप्पल, जेन्स जुताहरु र लहठी लगायतका सामानहरु बरामद गरेको छ। उक्त सामानको मूल्य १ लाख ४४ हजार ५ सय २० बराबरको रहेको प्रहरीले बताएको छ। बरामद सामान आवश्यक कारवाहीको लागि गौर भन्सार कार्यालयमा बुझाईएको जिल्ला प्रहरी कार्यालय रौतहटले जनाएको छ ।