नेशनल मेडिकल कलेजको पठनपाठन ठप्प
आर्दशवाणी संवादादाता । पर्सा, ६ मंसिर । चिकित्सा शिक्षा अध्ययनरत विद्यार्थीले शुल्क फिर्ता माग्दै सुरु गरेको आन्दोलनका कारण बीरगंजको नेशनल मेडिकल कलेजको पठनपाठन ठप्प भएको छ । सरकारले तोकेकोभन्दा कलेजले बढी शुल्क लिएको भन्दै फिर्ता गर्न विधार्थीहरुले माँग सहित करिब १ महिना देखि आन्दोलनमा रहेका छन् । बीरगंजको नेशनल मेडिकल सँगै चितावनको चितवन मेडिकल,कास्किीको गण्डकी र रुपन्देहीको युनिभर्सल मेडिकल कलेजको समेत पठनपाठन ठप्प भएको छ । बीरगंजको नेसनल मेडिकल कलेजमा झन्डै एक महिनादेखि आन्दोलित विद्यार्थीलाई बिहीबार कलेज प्रशासनले ज्यान मार्ने धम्की दिएको छ । कलेज अगाडि विद्यार्थीहरूले ‘अतिरिक्त शुल्क फिर्ता गर, मेडिकल माफिया मुर्दाबाद, विद्यार्थीलाई मानसिक तनाव दिन पाइँदैन’, ‘कलेज प्रशासनको विद्यार्थीसँगको सम्बन्ध सुमधुर हुनुपर्छ’ नारासहित प्लेकार्ड बोकी हिजो धर्नामा बसेका थिए । धर्नामा बसेकालाई धम्क्याइएको र राति अबेरसम्म छात्रावास प्रवेश गर्न नदिइएको विद्यार्थीले बताएका छन । चिकित्सा शिक्षा संघर्ष समितिका विद्यार्थी पनि उक्त कलेजका विद्यार्थीलाई सघाउन वीरगन्ज आएका थिए । कुटपिट र दमनको विरोधमा देशभरका मेडिकल कलेजका विद्यार्थीले काठमाडौंमा तीन दिनसम्म प्रदर्शन गरेका थिए । नेसनल कलेजमा सिनियर ब्याचका विद्यार्थी र बाहिरका युवासमेत ल्याएर कलेज प्रशासनले आन्दोलन दबाउन दमन गर्ने गरेको विद्यार्थीको भनाइ छ । सरकारले मेडिकल कलेजहरूलाई अतिरिक्त शुल्क फिर्ता गर्न दिएको पछिल्लो अल्टिमेटम सकिन ४ दिन मात्र बाँकी छ । शिक्षा मन्त्रालयले १५ दिनभित्र शुल्क फिर्ता गर्न कलेजहरूलाई सार्वजनिक सूचनाजारी गरेर अपिल गरेको हो । १५ दिनभित्र शुल्क फिर्ता नगरे मन्त्रिपरिषद्को निर्णयअनुसार कलेज सञ्चालकहरूलाई स्थानीय प्रशासनमार्फत कारबाही प्रक्रिया अघि बढाउने भनिएको छ । विद्यार्थी र अभिभावकलाई उजुरी दिन आग्रह गर्दै कारबाहीका लागि शिक्षा मन्त्रालयले गृह मन्त्रालयलाई पत्राचार गरिसकेको छ । यही मंसिर १ गते सम्पत्ति शुद्धीकरण अनुसन्धान विभागले बीरगंजको नेशनल मेडिकल कलेजसहित तीन वटा मेडिकल कलेजमा छापा मारको थियो । सरकारले पनि अतिरिक्त शुल्क फिर्ता वा मिलान गर्न पटक पटक निर्देशन दिएको तर मेडिकल कलेजहरुले उल्टै सरकारलाई तालाचाबी बुझाउने धम्की दिएपछि सरकारले ठगीमा मुद्दा चलाउने तयारी समेत गरेको छ ।
