प्रतिक्षा न्यौपाने
हेटौंडा–गत जेठ १६ गते हेटौंडा–३ बसामाडीकी ३५ वर्षीया सोनु थिङ आफ्नै घरमा डोरीले पासो लगाएर झुण्डिएर मृत्यु भएको अवस्थामा फेला परिन् । सोनुको माइती पक्षले सोनुलाई झुण्ड्याएर मारेको भन्दै प्रहरीमा उजुरी दिएको छ । तर शवको पोष्टमार्टम गर्दा हत्या भएको कुनै प्रमाण नभेटिएको प्रहरीको भनाइ छ । घटनाबारे प्रहरीले थप अनुसन्धान गरिरहेको छ । सोनुको रहस्यमयी मृत्युको दुईदिनअघि जेठ १४ गते हेटौंडा–९ की २२ वर्षीया प्रमिला थापा बुढाथोकी छानाको पाइपमा सल बाँधी झुण्डिएर मृत्यु भएको अवस्थामा फेला परेकी थिइन् । उनले पनि आत्महत्या नै गरेको प्रहरीले पुष्टी गरेको छ ।
यी त प्रतिनिधि घटना मात्र हुन् । पछिल्लो समय मकवानपुरमा आत्महत्याको घटना निकै बढेको प्रहरीको तथ्याङ्कले देखाएको छ । जेठ १ गतेदेखि १६ गतेसम्मको अवधिमा मात्र मकवानपुरमा ८ जनाले आत्महत्या गरेका छन् । जसमध्ये अधिकांशले झुण्डिएर आत्महत्या गरेको देखिन्छ भने केहीले विष सेवन गरी आत्महत्या गरेको पाइएको छ ।
जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक यज्ञप्रसाद भट्टराईका अनुसार मकवानपुरमा पछिल्लो समयमा आत्महत्याको घटना डरलाग्दो रुपमा बढिरहेको छ । उनका अनुसार मकवानपुरमा चालु आर्थिकवर्षको ११ महिनाको अवधिमा एकसय २८ जनाले झुण्डिएर र विष सेवन गरी आत्महत्या गरेका छन् । जसमध्ये ६९ जना पुरुष, ५५ जना महिला, ३ जना बालक र एकजना बालिका रहेका छन् ।
यस अवधिमा झुण्डिएर आत्महत्या गर्नेको संख्या ६७ छ भने विष सेवन गरी आत्महत्या गर्नेको संख्या ६१ रहेको छ । पछिल्ला तीनवर्षको तथ्याङ्क केलाउँदा बर्सेनि मकवानपुरमा आत्महत्या गर्नेको संख्या बढेको देखिन्छ । २०७२ देखि २०७५ सम्मको तीनवर्षको अवधिमा मकवानपुरमा तीनसय जनाले आत्महत्याको बाटो रोजेका छन् । आव २०७२/७३ मा मकवानपुरमा ९३ जनाले आत्महत्या गरेकोमा ०७३/७४ मा ९५ जनाले आत्महत्या गरेको प्रहरीको तथ्याङ्कले देखाउँछ । त्यस्तै ०७४/७५ मा एकसय १२ जनाले आफैंले आफ्नो ज्यान फालेका छन् ।
तथ्याङ्कअनुसार २५ देखि ३५ वर्ष उमेर समूहका मानिसहरुले बढी आत्महत्या गर्ने गरेका छन् । तीनवर्षको अवधिमा तीनवर्षको अवधिमा २५ देखि ३५ वर्षका ७६ जनाले आत्महत्या गरेका छन् भने १६ देखि २५ वर्षसम्मकाले पनि सोही हाराहारीमा आत्महत्या गरेका छन् । १६देखि २५ वर्ष उमेर समूहका ७५ जनाले झुण्डिएर तथा विष सेवन गरी आत्महत्या
गरेका छन् ।
३५ देखि ४५ वर्ष उमेर समूहका ६२ जना र ४५ देखि ६० वर्ष उमेर समूहका ४१ जनाले आत्महत्या गरेका छन् । तीनवर्षको अवधिमा ६० वर्षभन्दा माथिका ३८ जनाले आत्महत्या गरेको प्रहरी तथ्याङ्कले देखाएको छ । पेशागत आधारमा तथ्याङ्क केलाउँदा कृषि पेशा गर्नेहरुले बढी आत्महत्या गर्ने गरेको देखिन्छ । तीनवर्षमा आत्महत्या गर्ने तीनसयजनामध्ये एकसय ७६ जना कृषक रहेका छन् । त्यस्तै ज्याला मजदुरी गर्ने ६३ जनाले आत्महत्या गरेको प्रहरीले तथ्याङ्कमा उल्लेख छ । सो अवधिमा ४५ जना बेरोजगार र १६ जना विद्यार्थीले पनि आत्महत्या गरेका छन् ।
तीन वर्षे तथ्याङ्कअनुसार मकवानपुरको हेटौंडा उपमहानगरपालिकामा सबैभन्दा धेरै एकसय पाँचजनाले आत्महत्या गरेका छन् । थाहा नगरपालिकामा ३३ जनाले र मनहरी गाउँपालिकाका २४ जनाले आत्महत्या गरेका छन् । मकवानपुरगढीमा १८ र बकैया गाउँपालिकामा १२ जनाले आत्महत्या गरेका छन् । त्यसैगरी बागमती गाउँपालिकामा पनि नौ जनाले आत्महत्या गरेको प्रहरीको तथ्याङ्कमा उल्लेख छ । धेरैजसो आत्महत्याका घटना घरायसी झगडा एवम् आर्थिक अभाव जस्ता कारणले हुने गरेको प्रहरीको भनाइ छ ।